മഹാകവി അക്കിത്തത്തെത്തേടി ജ്ഞാനപീഠം പുരസ്‌കാരമെത്തി. സാഹിത്യത്തിനു നല്‍കിയ സമഗ്രസംഭാവനകള്‍ പരിഗണിച്ചാണ് പുരസ്കാരം. 11 ലക്ഷം രൂപയും സരസ്വതി ശില്‍പ്പവുമടങ്ങുന്നതാണ് പുരസ്കാരം.
”വെളിച്ചം ദുഃഖമാണുണ്ണീ, തമസ്സല്ലോ സുഖപ്രദം” എന്ന ഏറെ പ്രസിദ്ധമായ കവിതാവരികള്‍ അക്കിത്തത്തിന്റേതാണ്. ഇന്നത്തെ ഇന്ത്യന്‍ അവസ്ഥയില്‍ ഈ വരികള്‍ക്ക് പ്രത്യേക അര്‍ത്ഥവ്യാപ്തിയുണ്ട്.
‘ഇരുപതാം നൂറ്റാണ്ടിന്റെ ഇതിഹാസം’ ആണ് അക്കിത്തത്തിന്റെ ഏറെ പ്രശസ്തമായ കൃതി. ഏറെ ശ്രദ്ധേയമായ 43 ഗ്രന്ഥങ്ങളുടെ രചയിതാവാണദ്ദേഹം.
പാലക്കാട് ജില്ലയിലെ കുമാരനല്ലൂരില്‍ അക്കിത്തത് മനയില്‍ 1926 മാര്‍ച്ച് 18-നാണ് അക്കിത്തം അച്യുതന്‍ നമ്പൂതിരി ജനിച്ചത്. കേന്ദ്രസംസ്ഥാന പുരസ്‌കാരങ്ങളും എഴുത്തച്ഛന്‍ പുരസ്‌കാരവും അദ്ദേഹത്തിനു ലഭിച്ചു. 2017- ല്‍ പത്മശ്രീ നല്‍കി രാജ്യം അക്കിത്തത്തെ ആദരിച്ചു. ജ്ഞാനപീഠം ലഭിക്കുന്ന ആറാമത്തെ മലയാളിയാണ് അദ്ദേഹം.